“Ashxobod saylgohi” haqiqiy do‘stlik bog‘i bo‘ladi

Prezident Shavkat Mirziyoyev 2017 yilning 28 oktabr kuni poytaxtimizning Yashnobod tumanida qurib bitkazilgan «Ashxobod saylgohi»ni borib ko‘rgan, saylgoh atrofi, unga tutash hududlarni yanada obodonlashtirish bo‘yicha mutasaddilarga topshiriqlar bergan edi.

Davlatimiz rahbarining topshirig‘iga binoan bu yerda zamonaviy madaniyat va istirohat bog‘i majmuasining ikkinchi bosqich qurilish ishlari boshlab yuborildi.

Umumiy yer maydoni 12 gektarni o‘z ichiga olgan saylgohda 1 ta 1180 metr kvadratni tashkil etuvchi usti yopiq inshoot (indoor) ichida 26 ta, 31 ta ochiq tipdagi o‘yin attraksionlari, nuroniylar maskani, muzqaymoq va salqin ichimliklar hamda sovg‘alar shoxobchalari qurildi.

Prezident Shavkat Mirziyoyev olib borilayotgan ishlar bilan tanishish maqsadida “Ashxobod saylgohi”da bo‘ldi.

Saylgohga kiraverishda turkman millatining mardlik va jasorat timsoli bo‘lgan axalteke otlari aks etgan yaxlit kompozitsiya barpo etilgan. Bu yerdagi jihozlar turkman milliy me’morchilik an’analarini o‘zida mujassam etgan bo‘lib, qarag‘ay, qrim qarag‘ayi, xind sireni, eman, kashtan, magnoliya, arizona kiparisi, salviya, moviy archalar ekilgan.

Tashrif buyuruvchilarning ko‘ngilli xordiq chiqarashi uchun o‘rindiqlar, veloyo‘laklar, favvoralar o‘rnatilgan. Amfiteatr va kafe tashrif buyuruvchilarga muntazir.

Qurilish ishlariga 24 dan ortiq texnika, mashina va mexanizmlar hamda 500 nafarga yaqin malakali muhandis va ishchi xodim jalb qilindi.

“Ashxobod sayilgohi” zamonaviy madaniyat va istirohat bog‘i majmuasida 180 ish o‘rni yaratilishi ko‘zda tutilgan bo‘lib, bog‘ yaqin kunlarda foydalanishga topshirilishi kutilmoqda.

O‘zA




Prezidentimiz Yashnobod tumanidagi zamonaviy harbiylar shaharchasi qurilishi bilan tanishdi

Мамлакатимиз mudofaa salohiyatini yuksaltirish borasida amalga oshirilayotgan keng ko‘lamli islohotlar jarayonida harbiy xizmatchilarni har tomonlama qo‘llab-quvvatlash, ular uchun munosib turmush sharoiti yaratishga doimiy e’tibor qaratilmoqda.

Poytaxtimizning Yashnobod tumani «Olmos» mahalla fuqarolar yig‘ini hududida bunyod etilayotgan ko‘p qavatli yangi uylar ham o‘nlab harbiy xizmatchilar oilasiga olam-olam quvonch olib kelishi shubhasiz.

O‘zbekiston Respublikasi Prezidentining “2017 – 2020 yillarda shaharlarda arzon ko‘p kvartirali uylarni qurish va rekonstruksiya qilish dasturini samarali amalga oshirish borasidagi qo‘shimcha chora-tadbirlar to‘g‘risida”gi qaroriga muvofiq bu yerda 48 ta besh qavatli uy bunyod etilmoqda.

Loyihaga ko‘ra, birinchi bosqichda 540 xonadonga mo‘ljallangan 2,3, 4 xonali 18 ta 5 qavatli uy qurilmoqda.

Buyurtmachi – “Qishloq qurilish invest” IK, loyihalashtirish ishlari – bosh loyihachi “Qishloq qurilish loyixa” instituti tomonidan ishlab chiqilgan. Qurilish-montaj ishlari 12 ta pudrat tashkiloti tomonidan tasdiqlangan tarmoq jadvallari asosida amalga oshirilmoqda.

Bunyodkorlik ishlariga 30 dan ortiq texnika, mashina va mexanizmlar hamda 2000 nafarga yaqin malakali muhandis va ishchi xodim jalb qilingan. Bugungi kunga qadar 18 ta uyda g‘isht terish ishlari tugatilib, santexnika, pardozlash ishlari amalga oshirilmoqda.

Davlatimiz rahbari hududda amalga oshirilgan bunyodkorlik ishlari, uylarda yaratilayotgan sharoitlar bilan tanishdi.

– Sarhadlarimiz daxlsizligini himoya qilayotgan harbiy xizmatchilarimiz turmush sharoitini yaxshilash borasidagi islohotlar bundan keyin ham izchil davom ettiriladi, dedi Prezidentimiz. – Ularning farzandlari ta’lim-tarbiyasi va ijtimoiy himoyasi doimiy e’tiborimizda bo‘ladi.

Ikkinchi bosqich doirasidagi 900 xonadonga mo‘ljallangan 30 ta 5 qavatli uy qurilishi ham qizg‘in davom etmoqda. Buyurtmachi – “O‘zshahar qurilish invest” IK, bosh loyihachi – “Qishloq qurilish loyiha” instituti.

Barcha sharoitga ega zamonaviy harbiy shaharcha bo‘ladigan ushbu mavzeda bolalar bog‘chasi, maktab, poliklinika va boshqa ijtimoiy obyektlar ham barpo etiladi. Ushbu uylar Vatan himoyachilariga imtiyozli kredit asosida beriladi.

Shavkat Mirziyoyev uylarni o‘z vaqtida va sifatli qilib yakunlash yuzasidan mutasaddilarga tegishli ko‘rsatmalar berdi. Shu yerda huquqni muhofaza qilish organlari mutasaddilari bilan muloqot qildi.

O‘zA




“Uzbekistan Industrial exhibitions”: O‘zbekiston sanoati yutuqlari, ilg‘or tajribalar namoyishi

Toshkentdagi “O‘zekspomarkaz” milliy ko‘rgazmalar majmuida “Uzbekistan Industrial exhibitions – 2018” xalqaro sanoat ko‘rgazmalari boshlandi.

Xalqaro namoyishda O‘zbekiston sanoati va iqtisodiyotida amalga oshirilayotgan keng ko‘lamli ijobiy o‘zgarishlar o‘z aksini topgan. Bu mamlakatimizda o‘tkazilayotgan ko‘rgazmalarga xorij ishbilarmon doira vakillarining qiziqishi ortayotganida, qulay ishbilarmonlik muhiti samarasida mahalliy ishlab chiqaruvchilar safi va mahsulotlar turi kengayayotganida ham yaqqol ko‘zga tashlanadi.

Ko‘rgazmalarda mahalliy ishlab chiqaruvchilar bilan birga Xitoy, Janubiy Koreya, Rossiya, Turkiya, Germaniya, Slovakiya, Ukraina, Belarus, Hindiston, Polsha, Birlashgan Arab Amirliklari, Qozog‘iston, Qirg‘iziston kabi davlatlardan 100 ga yaqin kompaniya mahsulotlari va xizmatlari namoyish etilmoqda.

Mazkur ko‘rgazmada ishtirokchilar soni 2017-yilga nisbatan 40 foizga ko‘paydi. Ayniqsa, Rossiya, Qozog‘iston, Janubiy Koreya, Xitoy, Hindiston va Turkiya davlati sanoatchilari O‘zbekistonga katta qiziqish bildirmoqda.

“UzMiningExpo” xalqaro ko‘rgazmasida yerosti tabiiy boyliklarini qazib olish va ularni qayta ishlash majmui uchun asbob-uskunalar, boyituvchi va tashuvchi texnologiyalar, istiqbolli xizmatlar namoyish etilmoqda.

Tog‘-kon ishi mamlakatimiz iqtisodiyotining asosiy tarmoqlaridan biridir. Shu bois, O‘zbekistonda tog‘-kon sanoati korxonalarini texnik jihozlash, texnologiyalarni takomillashtirish borasida yaxshi tajriba to‘plangan. Shuningdek, sohaga jalb etilayotgan investitsiyalar, sanoatga eng zamonaviy texnologiyalar joriy etilishi izchil rivojlanish omili hisoblanadi.

– Tog‘-kon mahsulotlarini saralash, ularni maydalashda qo‘llaniladigan asbob-uskunalar ishlab chiqaramiz, – deydi “KSC Metallurgy Private Limited” kompaniyasi direktori Svarn Kapur (Hindiston). – O‘zbekistonga birinchi bor kelib, bu ko‘rgazmada ishtirok etayapmiz. Kelajakda o‘zbekistonlik hamkasblarimiz bilan hamkorlikda ishlashni rejalashtirganmiz.

“UzTechTransExpo” ekspozitsiyasi yo‘l-qurilish sohasi mutaxassislarida katta qiziqish uyg‘otdi. Bu yerda maxsus texnikalar, avtomobil butlovchi qismlari, transport va logistika, ombor majmualaridan foydalanish xizmatlari ko‘rgazmaga qo‘yilgan.

Xalqaro ko‘rgazmadan o‘rin olgan “UzSecureExpo” ekspozitsiyasi mahsulotlari ham e’tiborga molik. Unda sanoat obyektlarida xavfsizlikni ta’minlash texnik vositalari, ogohlantirish tizimlari, kompleks xavfsizlikni ta’minlash jihozlari, ratsiyalar, shaxsiy himoya vositalari, o‘t o‘chirgichlar, audio va video kuzatuv, texnika, texnologiyalar, halokat va ofatlarning oldini olish va ularning oqibatlarini bartaraf etish jihozlari namoyish etilmoqda.

– Intellektual xavfsizlik tizimini nazorat qilish uchun dasturiy texnologiya va qurilmalar ishlab chiqaramiz. Ular asosida mijozlarimizga eng zamonaviy xavfsizlik yechimini taklif qilamiz, – deydi “ABL-Soft&SS” kompaniyasi direktori o‘rinbosari Sherzod Olimov. – Bugun yetti turdagi mahsulot namoyish etayapmiz. Bular odamlarni yuzidan shaxsini va barmoq izini aniqlaydigan, ta’lim sohasida qo‘llaniladigan elektron davomat qurilmalari, axborot kiosk, avtomobil yo‘llari va inshootlari uchun videokuzatuv, jarimaga tortilib, qidiruvda bo‘lgan avtomobillarni aniqlash moslamalaridir. Mahsulotlarimizga talab yuqori. Bu ko‘rgazmada o‘zimizga yangi hamkorlar topamiz, degan umiddamiz.

“UzMetalMashExpo” ko‘rgazmasida metallurgiya, metallga ishlov berish, uskunasozlik texnologiyalari ham namoyish etilayotir. Bu sanoatning rivojlanish tendensiyalarini shakllantirish, mahalliy sanoatchilar bilan xorijlik mutaxassislar o‘rtasidagi hamkorlikni yangi bosqichga ko‘tarishga xizmat qiladi.

“Uzbekistan Industrial exhibitions – 2018” xalqaro sanoat ko‘rgazmalarida “UzChemPlastExpo” va “InterPackExpo” ekspozitsiyasi ham alohida ajralib turibdi. Ularda kimyo sanoati hamda qadoqlash, poligrafiya texnologiyalari ishtirokchilar e’tiboriga havola etilgan.

“O‘zekspomarkaz” milliy ko‘rgazmalar majmuida yana bir xalqaro tadbir – “Charm, poyabzal, kiyim va aksessuarlar” ko‘rgazmasi bo‘lib o‘tmoqda. Mahalliy korxonalar vakillari, xorijlik tadbirkorlar tomonidan zamonaviy dizayn asosida yaratilgan mahsulotlar ko‘pchilikda katta qiziqish uyg‘otmoqda.

Ko‘rgazmalar doirasida ilmiy-amaliy konferensiya, seminar va taqdimotlar o‘tkazilishi rejalashtirilgan.

O‘zbekiston Respublikasi Favqulodda vaziyatlar vazirligi, Davlat geologiya va mineral resurslar qo‘mitasi, Avtomobil yo‘llari davlat qo‘mitasi, “O‘zkimyosanoat” aksiyadorlik jamiyati, Toshkent shahar hokimligi va boshqa idora hamda tashkilotlar ko‘magida «IEG Uzbekistan» ko‘rgazma kompaniyasi tomonidan tashkil etilgan “Uzbekistan Industrial exhibitions – 2018” xalqaro sanoat ko‘rgazmalari 30 martga qadar davom etadi. Shu kunlar davomida “O‘zekspomarkaz” pavilyonlari zamonaviy sanoat uchun innovatsion texnologiyalar namoyish etilayotgan ishchan muloqot maydoniga aylanadi.
O‘zA




YeTTB delegatsiyasining uchrashuvlari

“Taraqqiyot strategiyasi” markazida 20-fevral kuni Yevropa tiklanish va taraqqiyot banki delegatsiyasi a’zolari bilan uchrashuv bo‘lib o‘tdi.

Tadbir Yevropa tiklanish va taraqqiyot bankining Markaziy Osiyo va Rossiya bo‘yicha boshqaruvchi direktori Natalya Xanjenkova boshchiligidagi delegatsiyaning mamlakatimizga tashrifi doirasida tashkil etildi.

“Taraqqiyot strategiyasi” markazi ijrochi direktori A.Burhonov bilan uchrashuvda markaz faoliyati, O‘zbekistonda ijtimoiy-siyosiy va sotsial-iqtisodiy sohalardagi islohotlarning borishi haqida so‘z yuritildi. Mehmonlarga 2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini Faol tadbirkorlik, innovatsion g‘oyalar va texnologiyalarni qo‘llab-quvvatlash yilida amalga oshirish jarayoni haqida ma’lumot berildi. Kichik biznes va xususiy tadbirkorlikni qo‘llab-quvvatlash, bank-moliya sohasini erkinlashtirishda xalqaro tashkilotlar bilan hamkorlikda qator loyihalar muvaffaqiyatli amalga oshirilayotgani alohida qayd etildi.

Natalya Xanjenkova O‘zbekistondagi izchil islohotlarni, mamlakatni har tomonlama rivojlantirish loyihalarini yuqori baholadi. Prezident Shavkat Mirziyoyev tanlagan jadal taraqqiyotga qaratilgan siyosat mamlakatning xalqaro maydondagi nufuzini yanada oshirishga xizmat qilayotganini ta’kidladi.

Mamlakatimizda iqtisodiyotni liberallashtirish, unda davlat ishtirokini kamaytirish orqali soha va tarmoqlarni diversifikatsiya qilish, xususiy mulk himoyasini kuchaytirish, kichik biznes va xususiy tadbirkorlikni rivojlantirish bo‘yicha qabul qilinayotgan qarorlar mehmonlarda katta qiziqish uyg‘otdi.

Muloqotda qonun ustuvorligini ta’minlash, fuqarolarni jamiyatda kechayotgan o‘zgarish va yangilanishlarning to‘laqonli ishtirokchisiga aylantirish kabi yo‘nalishlardagi hamkorlik masalalariga alohida e’tibor qaratildi.

O‘zA




O‘zbekiston – Ozarbayjon: tadbirkorlikda yangi hamkorlik davri boshlanmoqda

O‘zbekiston Savdo-sanoat palatasi tomonidan Ozarbayjon ishbilarmon doiralari vakillari va mahalliy tadbirkorlar ishtirokida biznes-forum tashkil etildi.

Tadbirda Ozarbayjonning qurilish, savdo, tibbiyot anjomlari, farmatsevtika, qadoqlash materiallari, matbaa, AKT kabi sohalarda faoliyat yuritayotgan yirik kompaniyalaridan 20 dan ortiq vakil, mahalliy korxona va kompaniyalarning 50 dan ortiq mas’uli ishtirok etdi.

Tarixiy qadriyatlari, dunyoqarashi, madaniyati o‘xshash ikki mamlakat ishbilarmon doiralari uchrashuvida so‘zga chiqqan O‘zbekiston Savdo-sanoat palatasi raisi Adham Ikromov, Ozarbayjon Respublikasining mamlakatimizdagi Favqulodda va muxtor elchisi Guseyn Guliyev, Ozarbayjon Tadbirkorlar uyushmalari milliy konfederatsiyasi prezidenti Mamed Musayev va boshqalar ikki davlat tadbirkorlari o‘rtasida sheriklik munosabatlarini kengaytirish yo‘lidagi sa’y-harakatlar yaqin kelajakda o‘z samarasini berishiga ishonch bildirdi.

Ta’kidlandiki, Prezident Shavkat Mirziyoyev rahnamoligida O‘zbekistonda qulay ishbilarmonlik muhiti yaratishga alohida e’tibor qaratilmoqda. Mahalliy tadbirkorlar va xorijiy investorlar uchun soliq imtiyozlari va preferensiyalar berilishi, valyuta siyosatining liberallashtirilishi, tadbirkorlik subyektlari uchun tekshiruvlarning keskin kamaytirilishi, kredit ajratishda soddalashtirilgan tartib joriy etilishi shular jumlasidandir.

O‘zbekistonda Ozarbayjon sarmoyasi ishtirokida 84 korxona faoliyat yuritadi. Ulardan 71 tasi qo‘shma, 11 tasi to‘liq ozarbayjonlik ishbilarmonlar sarmoyasi ishtirokidagi korxonalardir. Ushbu korxonalar savdo, mashinasozlik, metalni qayta ishlash, moliya, energetika, xizmat ko‘rsatish, oziq-ovqat va yengil sanoat kabi sohalarda faoliyat yuritmoqda.

Tadbirda bu ko‘rsatkichlar mavjud imkoniyatlarga mos emasligi qayd etildi. Ikki davlat tadbirkorlari o‘rtasida o‘zaro hamkorlikni mustahkamlash masalalari muhokama qilindi. Asosiy e’tibor yangi qo‘shma korxonalar sonini hamda ikki tomonlama mahsulot aylanmasi hajmini oshirishga qaratildi.

O‘zbekiston Respublikasi Investitsiyalar bo‘yicha davlat qo‘mitasi, “O‘zqurilishmateriallari” AJ, “O‘zkimyosanoat” AJ, “Tashkent city” xalqaro ishbilarmonlik markazi direksiyasi, Ozarbayjon Respublikasi Tadbirkorlar uyushmalari milliy konfederatsiyasi, “Neuron Technologies LLC” kompaniyasi mas’ul vakillari tadbirkorlik sohasida hamkorlikni rivojlantirishga doir takliflar bildirdi.

– O‘zbekistonda tadbirkorlik yaxshi rivojlanmoqda. Ayniqsa, ayollar tadbirkorligiga alohida e’tibor qaratilayotgani quvonarli, – dedi Ozarbayjonda ayollar tadbirkorligini rivojlantirish assotsiatsiyasi raisi Sabina Babayeva. – Biz ham to‘qimachilik va tibbiyot sohasida o‘zbekistonlik tadbirkor ayollar bilan hamkorlik qilish maqsadida takliflar bilan keldik. O‘ylaymizki, o‘zbekistonlik tadbirkor ayollar bilan oson til topishamiz va hamkorligimiz kutganimizdek rivojlanadi.

Biznes-forum yakunida O‘zbekiston Savdo-sanoat palatasi va Ozarbayjon Tadbirkorlar uyushmalari milliy konfederatsiyasi o‘rtasida hamkorlik bitimi imzolandi.

Xalqaro press-klub ko‘magida O‘zbekiston Savdo-sanoat palatasi raisi A.Ikromov va Ozarbayjon Tadbirkorlar uyushmalari milliy konfederatsiyasi prezidenti M.Musayev ishtirokida bo‘lib o‘tgan matbuot anjumanida ikki mamlakat ishbilarmonlari hamkorlikdan birdek manfaatdor ekani ta’kidlandi. Ozarbayjonlik ishbilarmon doiralar vakillarining O‘zbekistondagi yirik kompaniyalar bilan tanishishi, vazirlik va idoralarda uchrashuvlar tashkil etilishi, shuningdek, Samarqand va Buxoro kabi tarixi qadim shaharlarga sayohat uyushtirilishi rejalashtirilgani aytildi.

O‘zA




Shavkat Mirziyoyev Toshkent shahrini rivojlantirishga doir loyiha bilan tanishdi.

Bugungi kunda jahonda shaharsozlikning “High Tech City”, “Smart City” yo‘nalishlari ommalashmoqda. Rivojlangan davlatlarda shaharlar qurilishida yuqori texnologiyalardan keng foydalanilmoqda.

Poytaxtimizda ham Janubiy Koreya tajribasi asosida shunday mavze barpo etish mo‘ljallanmoqda.

Prezidentimiz shu boradagi konsepsiya bilan tanishdi, janubiy koreyalik ishbilarmonlar bilan suhbatlashdi. Bu haqda O‘zbekiston Respublikasi Prezidentining Matbuot xizmati xabar berdi.

O’zA




Prezident Olmazor tumaniga tashrif buyurdi

Davlatimiz rahbari tashabbusi bilan Olmazor tumani Qichqiriq kanali bo‘yida madaniyat va istirohat bog‘i barpo etilishi rejalashtirilgan.

Shavkat Mirziyoyevga mazkur park loyihasi yuzasidan ma’lumot berildi. Bu haqda O‘zbekiston Respublikasi Prezidentining Matbuot xizmati xabar berdi.

Bog‘da bolalar va sport maydonchalari, zamonaviy attraksionlar tashkil etiladi. Abdulla Qodiriy va Cho‘lpon nomidagi kutubxonalar, Nuroniylar maskani quriladi.

Prezidentimiz kutubxonalarning poytaxt maktablari bilan hamkorligini yo‘lga qo‘yish, Abdulla Qodiriy va Cho‘lpon ijodini yoshlarga chuqurroq o‘rgatish zarurligini ta’kidladi.

Aholining dam olishi uchun qulayliklarni oshirish, xususan, Nuroniylar maskanida choyxona va askiya markazi tashkil qilish, yaqin joyda poliklika barpo etish bo‘yicha ko‘rsatmalar berdi.

Prezidentimiz Toshkent shahrida «Xavfsiz shahar» konsepsiyasi asosida olib borilayotgan ishlar bilan tanishdi.

Davlatimiz rahbari uyma-uy yurib, odamlar bilan suhbatlashish, ularning muammolarini hal qilishga ko‘maklashish, ish o‘rinlari yaratish, jaholatga qarshi ma’rifat bilan kurashish zarurligini ta’kidladi.

O’zA