Toshkent shahar statistika boshqarmasida “Toshkent shahrining demografik holati 2022-yil yanvar-sentabr oylarida” mavzusida matbuot anjumani tashkil etildi.
Matbuot anjumanida Toshkent shahar statistika boshqarmasi rahbariyati, ommaviy axborot vositalari xodimlari hamda Davlat tashkilotlari matbuot kotiblari, blogerlar ishtirok etdi.
Matbuot anjumanida ta'kidlanganidek, bugungi kunda yurtimizda aholining soni va uning o‘sish sur’atlari uzluksiz ravishda ortmoqda.
Toshkent shaharida doimiy aholi soni 2022 yil 1- oktabr holatiga ko‘ra 2 million 934 ming 100 kishini tashkil etmoqda. Yil boshidan 71,7 ming kishiga yoki 2,5 foizga ko‘paydi. Shundan: erkaklar soni 1 438 500 kishini, ayollar soni 1 495 600 kishini tashkil etdi.
Shahar hududlari kesimida tahlillar shuni ko‘rsatadiki, 2022 yil 1 oktabr holatiga ko‘ra, eng ko‘p aholi soni: Olmazor tumanida bo‘lib, 392,4ming kishini tashkil etadi. Shuningdek, Yunusobod tumanidagi aholi 364,8 ming kishidan iborat.
Eng kam aholi soni Yakkasaroy tumanida – 126,2 ming kishi va Bektemir tumanida – 55,0 ming kishi tashkil etgan.
Matbuot anjumanida shuningdek, 2022- yilning yanvar-sentabr oylarida 54,8 mingta tug‘ilganlar qayd etilgan bo‘lib, shundan o‘g‘il bolalar 51,6 % ni, qiz bolalar 48,4 % ni tashkil etadi deb aytib o‘tildi.
Matbuot anjumanida mutaxassislar jurnalistlar tomonidan berilgan barcha savollarga atroflicha javob berdi.
Axborot xizmati